ស្ត្រីដែលមានសតិមិនប្រក្រតីម្នាក់ ត្រូវបានបុរសម្នាក់រំលោភជាច្រើនដង រហូតដល់មានផ្ទៃពោះ!


ចេញផ្សាយ: ចុះផ្សាយថ្ងៃទី១៩ កញ្ញា ២០២២ ដោយទស្សនៈមហាជន

ខេត្តក្រចេះ: កម្លាំងជំនាញ នៃអធិការដ្ឋាននគរបាលស្រុកចិត្របុរី សហការជាមួយកម្លាំងប៉ុស្តិ៍នគរបាលរដ្ឋបាលឃុំដារ ដឹកនាំដោយលោក វរសេនីយ៍ ឯក ប៊ុត នឿន អធិការនគរបាលស្រុក នឹងមានការសម្របសម្រួលនិតិវិធី ដោយ លោក គឺ ប៊ុណ្ណារ៉ា ព្រះរាជអជ្ញាអមសាលាដំបូងខេត្តក្រចេះ និងក្រោមការដឹកនាំបញ្ជាផ្ទាល់ពីលោកឧត្តមសេនីយ៍ ទោ អ៊ូ សុប៊ុណ្ណា ស្នងការនគរបាលខេត្ត បានធ្វើការឃាត់ខ្លួនបុរសម្នាក់ភ្លាមៗ នៅថ្ងៃទី១២ ខែកញ្ញា ឆ្នាំ២០២២ ពាក់ព័ន្ធករណីរំលោភសេពសន្ថវ: លើនារីរងគ្រោះដែលមានសតិមិនប្រក្រតី តាមបណ្តឹងអាណាព្យាបាលឈ្មោះ សុខ នេន អាយុ៦០ឆ្នាំ។

យោងតាមរបាយការណ៍របស់សមត្ថកិច្ចបានឲ្យដឹងថា បុរសដែលបានរំលោភលើនារី ដែលមានសតិមិនប្រក្រតី ឈ្មោះ ឃិន សុខ ភេទប្រុស អាយុ៣៩ឆ្នាំ ជនជាតិខ្មែរ មុខរបរកសិករ រស់នៅភូមិជួរក្រូចុំ ឃុំថ្មអណ្ដើក ស្រុកចិត្របុរី ខេត្តក្រចេះ។
ចំណែកនារីរងគ្រោះឈ្មោះ អឿ ទាវ ភេទស្រី អាយុ២១ឆ្នាំជនជាតិខ្មែរ (ក្នុងបន្ទុក) មានសតិមិនប្រក្រតី(សង្ស័យជម្ងឺឆ្កួតជ្រូក)រស់នៅភូមិសេរីភាព ឃុំដារ ស្រុកចិត្របុរី ខេត្តក្រចេះ ។

តាមចម្លើយសារភាពរបស់ជនសង្ស័យបានឲ្យដឹងថា កាលពីថ្ងៃទី០៤ ខែមេសា ឆ្នាំ២០២២ វេលាម៉ោង ០៧និង០០នាទី ថាខ្លួនពិតជាបានធ្វើសកម្មភាពបំពានផ្លូវភេទទៅលើជនរងគ្រោះពិតប្រាកដមែន នៅចំណុចអូរតាពោន ស្ថិតនៅភូមិខ្សារ ឃុំដារ ស្រុកចិត្របុរី ខេត្តក្រចេះ។
ជនសង្ស័យបន្តថា ខ្លួនគេបានស្នាក់នៅក្បែរគ្នា ជាមួយគ្រួសារជនរងគ្រោះ ក្នុងរោងមួយ និងប្រកបរបរធ្វើស្រែចំការជាមួយប្រពន្ធរបស់ខ្លួនឈ្មោះ ណាង ថារី នៅទីនោះ។ លុះនៅថ្ងៃកើតហេតុខាងលើ ដោយខ្លួនឃើញជនរងគ្រោះ ដើរមកក្បែរអណ្តូងទឹកក្រោយផ្ទះតែម្នាក់ឯង ឃើញឪកាសល្អ ខ្លួនក៏ធ្វើសកម្មភាពរំលោភទៅលើជនរងគ្រោះបានសម្រេចតែម្តង នឹងបានបន្តរំលោភជាបន្តបន្ទាប់ទៀតនៅកន្លែងផ្សេងៗគ្នា រហូតជនរងគ្រោះឈានដល់មានផ្ទៃពោះ ទើបបែកការដល់អាណាព្យាបាល ប្តឹងសមត្ថកិច្ចឲ្យឃាត់ខ្លនតែម្តង។
បច្ចុប្បន្នជនសង្ស័យឈ្មោះ ឃិន សុខ កំពុងត្រូវបានឃាត់ខ្លួនជាបណ្ដោះអាសន្ននៅអធិការននគរបាលស្រុកចិត្របុរី ដើម្បីបំពេញសំណុំរឿងបញ្ជូនទៅការិយាល័យជំនាញនិងរង់ចាំអនុវត្តតាមនិតិវិធីបន្ត៕