ស្ដ្រីអ្នកជំនួញម្នាក់នេះ ប្រើប្លង់ដីក្លែងក្លាយឆបោកលុយម្ចាស់បំណុលជិត២០ម៉ឺនដុល្លារ ត្រូវសមត្ថកិច្ចចាប់ខ្លួនបានហើយ និងកំពុងស្វែងរកចាប់ខ្លួនប្ដីដែលជាអ្នកខុបឃឺត។

ជនល្មើសខាងលើមានឈ្មោះ ជា សុផល្លា អាយុ៤២ឆ្នាំ ជនជាតិខ្មែរ មុខរបរពាណិជ្ជករ មានអាសយដ្ឋានផ្ទះលេខ៥ (បុរីពិភពថ្មីសំរោងអណ្តែត) ផ្លូវលេខ១ សង្កាត់គោកឃ្លាង ខណ្ឌសែនសុខ រាជធានីភ្នំពេញ។

កន្លងមក ប្តីប្រពន្ធមួយគូនេះឈ្មោះអ្នកមានឥទ្ធិពលមកប្រើប្រាស់ធ្វើជាខ្នងបង្អែក ដើម្បីដាក់សម្ពាធ និងតទល់ជាមួយម្ចាស់បំណុល ក្នុងគោលដៅមិនទទួលខុសត្រូវ ហើយប្តីប្រពន្ធជើងខ្លាំងមួយគូនេះល្បីឈ្មោះ និងជំនាញខាងធ្វើប្លង់ក្លែងក្លាយ ដែលបានឆបោកលុយប្រជាពលរដ្ឋច្រើនលានដុល្លារអាមេរិកមកហើយ។

ម្យ៉ាងវិញទៀត ប្តីប្រពន្ធមួយគូនេះត្រូវបានជនរងគ្រោះជាច្រើនប្តឹងទៅតុលាការ ពាក់ព័ន្ធនឹងទង្វើទុច្ចរិតជាច្រើនផ្សេងទៀត ដែលសំណុំរឿងទាំងនោះកំពុងដំណើរការនៅតុលាការ។