នៅថ្ងៃទី៣១ ខែតុលាម្សិលមិញ កម្លាំងសមត្ថកិច្ចកម្ពុជា បានឃាត់ខ្លួនជនសង្ស័យសរុបចំនួន១១១នាក់ ពាក់ព័ន្ធនឹងករណីឆបោកអនឡាញ ក្រោយសមត្ថកិច្ចបានចុះបង្ក្រាបទីតាំងអគារមួយកន្លែងស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។ នេះបើផ្អែកតាមរបាយការណ៍ដែលផ្តល់ដោយអ្នកនាំពាក្យក្រសួងព័ត៌មានលោក ទេព អស្នារិទ្ធ។ ក្នុងចំណោមជនសង្ស័យទាំងអស់នោះ សមត្ថកិច្ចបានកំណត់អត្តសញ្ញាណថា មានជនជាតិឥណ្ឌូណេស៊ីចំនួន១០៦នាក់ (ស្ត្រី៣៦នាក់) និងបុរសជនជាតិខ្មែរចំនួន៥នាក់។ ក្រោមកិច្ចសម្របសម្រួលពីព្រះរាជអាជ្ញារង កម្លាំងចម្រុះនៃគណៈបញ្ជាការឯកភាពរាជធានីភ្នំពេញក៏បានរឹបអូសសម្ភារៈជាវត្ថុតាងមួយចំនួនទៀត ដូចជា រថយន្ត២គ្រឿងម៉ាក HYUNDAI STARIA ដោយមួយមានពណ៌ស និងមួយទៀតមានពណ៌ខ្មៅ។ ក្រោយពីត្រួតពិនិត្យចប់សព្វគ្រប់ ជនសង្ស័យ និងវត្ថុតាងទាំងអស់ ត្រូវបានប្រគល់ជូនសមត្ថកិច្ចជំនាញ នៃស្នងការដ្ឋាននគរបាលរាជធានីភ្នំពេញ ដើម្បីបន្តតាមនីតិវិធីច្បាប់៕

រូបភាព៖ ក្រសួងព័ត៌មាន